ਗਲਾਸਗੋ : 28 ਜੁਲਾਈ, 2026

ਗਲਾਸਗੋ ਵਿੱਚ ਚੱਲ ਰਹੀਆਂ ਰਾਸ਼ਟਰਮੰਡਲ ਖੇਡਾਂ 2026 ਦੇ ਪੰਜਵੇਂ ਦਿਨ ਭਾਰਤੀ ਐਥਲੀਟਾਂ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਦੇਸ਼ ਦੀ ਝੋਲੀ ਵਿੱਚ ਕਈ ਮਹੱਤਵਪੂਰਨ ਤਮਗੇ ਪਾਏ। ਭਾਰਤ ਨੇ ਹੁਣ ਤੱਕ ਕੁੱਲ 10 ਮੈਡਲ ਜਿੱਤ ਲਏ ਹਨ, ਜਿਨ੍ਹਾਂ ਵਿੱਚ 2 ਸੋਨੇ, 5 ਚਾਂਦੀ ਅਤੇ 3 ਕਾਂਸੀ ਦੇ ਤਮਗੇ ਸ਼ਾਮਲ ਹਨ। ਇਸ ਪ੍ਰਦਰਸ਼ਨ ਦੇ ਨਾਲ ਭਾਰਤ ਮੈਡਲ ਤਾਲਿਕਾ ਵਿੱਚ ਅੱਠਵੇਂ ਸਥਾਨ ‘ਤੇ ਪਹੁੰਚ ਗਿਆ ਹੈ, ਜਦੋਂ ਕਿ ਆਸਟ੍ਰੇਲੀਆ 26 ਸੋਨੇ ਦੇ ਤਮਗਿਆਂ ਸਮੇਤ ਕੁੱਲ 59 ਮੈਡਲਾਂ ਨਾਲ ਸਿਖਰ ‘ਤੇ ਬਣਿਆ ਹੋਇਆ ਹੈ।

ਸ਼ੋਟ ਪੁੱਟ ਈਵੈਂਟ ਵਿੱਚ ਭਾਰਤ ਦੀ ਸ਼ਰਮਿਲਾ ਧਨਖੜ ਨੇ ਔਰਤਾਂ ਦੇ ਸ਼ੋਟ ਪੁੱਟ ਐੱਫ57 ਵਰਗ ਵਿੱਚ 9.81 ਮੀਟਰ ਦਾ ਸਰਵੋਤਮ ਥ੍ਰੋਅ ਕਰਕੇ ਸੋਨੇ ਦਾ ਤਮਗਾ ਆਪਣੇ ਨਾਮ ਕੀਤਾ। ਇਸੇ ਮੁਕਾਬਲੇ ਵਿੱਚ ਵਿਰੋਧ ਦਰਜ ਕਰਵਾਉਣ ਤੋਂ ਬਾਅਦ ਭਾਰਤ ਦੀ ਸ਼ਿਲਪਾ ਸ਼ਾਇਲਾ ਨੂੰ ਕਾਂਸੀ ਦਾ ਤਮਗਾ ਦਿੱਤਾ ਗਿਆ।

ਇਸ ਤੋਂ ਇਲਾਵਾ, ਉੱਚੀ ਕੂਦ (ਹਾਈ ਜੰਪ) ਮੁਕਾਬਲੇ ਵਿੱਚ ਸਰਵੇਸ਼ ਕੁਸ਼ਾਰੇ ਨੇ 2.25 ਮੀਟਰ ਦੀ ਛਲਾਂਗ ਲਗਾ ਕੇ ਇਤਿਹਾਸ ਰਚਦਿਆਂ ਚਾਂਦੀ ਦਾ ਤਮਗਾ ਜਿੱਤਿਆ। ਉਹ ਰਾਸ਼ਟਰਮੰਡਲ ਖੇਡਾਂ ਦੀ ਪੁਰਸ਼ ਉੱਚੀ ਕੂਦ ਵਿੱਚ ਚਾਂਦੀ ਦਾ ਤਮਗਾ ਜਿੱਤਣ ਵਾਲੇ ਪਹਿਲੇ ਭਾਰਤੀ ਬਣੇ ਹਨ। ਵੇਟਲਿਫਟਿੰਗ ਵਿੱਚ ਵੱਲੂਰੀ ਅਜੇ ਬਾਬੂ ਨੇ ਪੁਰਸ਼ਾਂ ਦੇ 79 ਕਿਲੋਗ੍ਰਾਮ ਵਰਗ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਚਾਂਦੀ ਦਾ ਤਮਗਾ ਭਾਰਤ ਦੇ ਨਾਮ ਕੀਤਾ। ਬਾਕਸਿੰਗ ਵਿੱਚ ਵੀ ਸਚਿਨ ਸਿਵਾਚ, ਅੰਕੁਸ਼ ਅਤੇ ਸਾਕਸ਼ੀ ਚੌਧਰੀ ਨੇ ਆਪਣੇ-ਆਪਣੇ ਵਰਗਾਂ ਦੇ ਕਵਾਟਰ ਫਾਈਨਲ ਵਿੱਚ ਜਗ੍ਹਾ ਪੱਕੀ ਕਰ ਲਈ ਹੈ।