ਪੰਜਾਬੀ ਸੰਗੀਤ ਉਦਯੋਗ ਵਿੱਚ ਬਾਬਾ ਬੋਹੜ ਵਜੋਂ ਜਾਣੇ ਜਾਂਦੇ ਪ੍ਰਸਿੱਧ ਗਾਇਕ ਗੁਰਦਾਸ ਮਾਨ, ਅੱਜ ਐਤਵਾਰ ਸਵੇਰੇ ਮਰਹੂਮ ਪੰਜਾਬੀ ਗਾਇਕ ਸਿੱਧੂ ਮੂਸੇਵਾਲਾ ਦੇ ਪਿੰਡ ਮੂਸੇਵਾਲਾ ਪਹੁੰਚੇ। ਉਹ ਮੂਸੇਵਾਲਾ ਦੀ ਹਵੇਲੀ ਵੀ ਗਏ ਅਤੇ ਪਰਿਵਾਰ ਨਾਲ ਮੁਲਾਕਾਤ ਕੀਤੀ। ਗੁਰਦਾਸ ਮਾਨ ਨੇ ਨਿੱਕੇ ਸਿੱਧੂ ਦੇ ਪੈਰ ਛੂਹੇ , ਇਸ ਦੌਰਾਨ ਮਾਹੌਲ ਬਹੁਤ ਭਾਵੁਕ ਹੋ ਗਿਆ।
ਜਿਵੇਂ ਹੀ ਗੁਰਦਾਸ ਮਾਨ ਨੇ ਹਵੇਲੀ ਵਿੱਚ ਕਦਮ ਰੱਖਿਆ, ਉਨ੍ਹਾਂ ਨੇ ਆਪਣੀਆਂ ਬਾਹਾਂ ਫੈਲਾਈਆਂ ਅਤੇ ਸਿੱਧੂ ਨੂੰ ਯਾਦ ਕੀਤਾ। ਗਾਇਕ ਗੁਰਦਾਸ ਮਾਨ ਨੇ ਜਦੋਂ ਸਿੱਧੂ ਮੂਸੇਵਾਲਾ ਦੇ ਛੋਟੇ ਭਰਾ ਨਿੱਕੇ ਸਿੱਧੂ ਨੂੰ ਦੇਖਿਆ ਤਾਂ ਉਨ੍ਹਾਂ ਕਿਹਾ, “ਬਿਲਕੁੱਲ ਹੂ-ਬ-ਹੂ (ਸ਼ੁਭਦੀਪ), ਉਹੀ ਭਾਵਨਾ, ਉਹੀ ਚਿਹਰਾ।” ਸਿੱਧੂ ਦੀ ਮਾਂ ਚਰਨ ਕੌਰ ਨੇ ਉਨ੍ਹਾਂ ਦਾ ਸਵਾਗਤ ਕੀਤਾ, ਤਾਂ ਮਾਨ ਨੇ ਉਨ੍ਹਾਂ ਦੇ ਪੈਰ ਛੂਹ ਕੇ ਉਨ੍ਹਾਂ ਤੋਂ ਆਸ਼ੀਰਵਾਦ ਲਿਆ, ਅਤੇ ਛੋਟੇ ਸਿੱਧੂ ਦੇ ਪੈਰ ਛੂਹੇ ਤਾਂ ਛੋਟੇ ਸਿੱਧੂ ਨੇ ਗਾਇਕ ਦੇ ਪੈਰੀਂ ਹੱਥ ਲਗਾਇਆ। ਮਹਿਲ ਵਿੱਚ ਦਾਖਲ ਹੋਣ ‘ਤੇ, ਗੁਰਦਾਸ ਮਾਨ ਨੇ ਪਹਿਲਾਂ ਸਿੱਧੂ ਮੂਸੇਵਾਲਾ ਦੀ ਤਸਵੀਰ ਅੱਗੇ ਝੁਕਿਆ ਅਤੇ ਉਨ੍ਹਾਂ ਨੂੰ ਸਲਾਮ ਕੀਤਾ।
ਗੁਰਦਾਸ ਮਾਨ ਕੱਲ੍ਹ ਰੱਤ ਮਾਨਸਾ ਵਿਖੇ ਇੱਕ ਨਿੱਜੀ ਪ੍ਰੋਗਰਾਮ ਵਿੱਚ ਸ਼ਿਕਰਤ ਕਰਨ ਲਈ ਪਹੁੰਚੇ ਸੀ। ਇਸ ਦੌਰਾਨ ਉਨ੍ਹਾਂ ਨੇ ਸਟੇਜ ‘ਤੇ ਮੂਸੇਵਾਲਾ ਨੂੰ ਯਾਦ ਕਰਦਿਆਂ ਖਾਸ ਤੌਰ ‘ਤੇ ਲਿਖੀ ਕਵਿਤਾ ਦੀ ਕੁਝ ਲਾਈਨ ਸੁਣਾਈ, “ਬੜਾ ਪਿਆਰ ਤੈਨੂੰ ਬੜਾ ਸਤਿਕਾਰ ਤੈਨੂੰ… ਸਿੱਧੂ ਮੂਸੇਵਾਲਿਆ ਸਲਾਮ ਤੇਰੇ ਸ਼ਹਿਰ ਨੂੰ… ਅੱਜ ਤੱਕ ਭੁੱਲੀ ਨਹੀਂ ਨਿਵੇਕਲੀ ਜਿਹੀ ਸ਼ਾਇਰੀ ਤੇਰੀ…ਜਜ਼ਬਾ ਜਨੂੰਨ ਤੇਰੇ ਗੀਤਾਂ ਚ ਸਕੂਨ ਤੇਰੇ…ਡੀਕ ਲਾ ਕੇ ਪੀ ਗਿਆ ਤੂੰ ਦੁਨੀਆ ਦੇ ਜ਼ਹਿਰ ਨੂੰ…ਜੱਗ ਉੱਤੇ ਕਾਇਮ ਰਹੂ ਸਰਦਾਰੀ ਤੇਰੀ ਭੁੱਲ ਕੇ ਵੀ ਭੁੱਲਿਆ ਨਹੀਂ ਜਾਣਾ ਤੇਰੇ ਸ਼ਹਿਰ ਨੂੰ…ਜਿਸ ਨੂੰ ਸੁਣ ਕੇ ਉੱਥੇ ਮੌਜੂਦ ਸਾਰੇ ਲੋਕਾਂ ਦੀਆਂ ਅੱਖਾਂ ਨਮ ਹੋ ਗਈਆਂ।
